Vijana Wakitanzania wameaswa kuacha matumizi mabaya ya mitandao ya kijamii yanayohusisha matusi, kejeli na uchochezi, badala yake kuitumia kama chombo cha kujifunza, kujiajiri na kuongeza kipato.
Wito huo umetolewa na wadau wa mawasiliano na maendeleo ya vijana, wakisema kuwa katika zama hizi za teknolojia, mitandao ya kijamii imekuwa na nafasi kubwa katika kujenga au kubomoa mustakabali wa vijana kulingana na namna wanavyoitumia.
Akizungumza na gazeti hili, mtaalamu wa mawasiliano, Bw. John Zakaria alisema tabia ya kutumia mitandao hiyo kwa lugha zisizofaa imekuwa ikiongezeka na inaweza kuathiri taswira ya vijana pamoja na fursa zao za ajira na biashara.
“Mitandao ya kijamii si sehemu ya kutukanana. Ni jukwaa la kujenga hoja, kubadilishana mawazo na kujitangaza kibiashara. Vijana wanapaswa kuitumia kwa busara ili iwe na tija kwa maisha yao,” alisema Bw. John.
Alieleza kuwa vijana wengi wana vipaji na ubunifu mkubwa ambao unaweza kugeuzwa kuwa chanzo cha kipato kupitia majukwaa ya kidijitali, ikiwa ni pamoja na uuzaji wa bidhaa, utoaji wa huduma na uundaji wa maudhui yenye manufaa.
Kwa upande wake, kijana mfanyabiashara mtandaoni Bw. Hamisi Mussa alisema mitandao ya kijamii imemsaidia kukuza biashara yake na kufikia wateja wengi zaidi ndani na nje ya nchi.
“Nilianza kwa kuweka picha za bidhaa zangu mtandaoni, lakini sasa ninapata oda kila siku. Kama tungetumia muda wetu kutukanana, tusingefikia mafanikio haya,” alisema Bw. Hamisi.
Wadau hao walisisitiza kuwa mitandao ya kijamii pia ni chanzo muhimu cha maarifa, ambapo vijana wanaweza kujifunza ujuzi mbalimbali kama vile biashara, teknolojia, lugha na stadi za maisha kupitia maudhui yanayopatikana mtandaoni.
Aidha, walitoa rai kwa wazazi, walimu na viongozi wa jamii kuwahamasisha vijana kutumia mitandao hiyo kwa njia chanya na yenye kujenga.
“Ni muhimu kujenga utamaduni wa uwajibikaji mtandaoni. Kila kijana anapaswa kufahamu kuwa anachochapisha kina athari kwa jamii na kwa maisha yake binafsi,” alisema mdau mwingine wa elimu ya kidijitali, Bi Elizabeth Komba.
Kwa mujibu wa takwimu za wadau wa sekta ya mawasiliano, matumizi ya mitandao ya kijamii nchini yanaendelea kuongezeka kwa kasi, hali inayofungua fursa mpya za kiuchumi lakini pia kuhitaji matumizi yenye nidhamu na maadili.
Kwa ujumla, wadau wamekubaliana kuwa mitandao ya kijamii inaweza kuwa nyenzo muhimu ya maendeleo kwa vijana ikiwa itatumika kwa malengo sahihi ikiwa ni pamoja na kujifunza, kujiajiri na kujenga mahusiano chanya badala ya kuwa chanzo cha migogoro na lugha zisizofaa.
